Sesel i zwenn avek bokou lezot pei atraver lemonn pour komemor sa zour spesyal pour bann zanfan. I en zour kot nou rekonnet lenportans bann zanfan dan nou lavi e otour nou. Dan zot linosans, zanfan i anplifye lavi bann adilt avek bokou lazwa. Dan zot prop fason, zot donn bann adilt lespwar e sa dezir pour viv.
Ozordi nou anvi reafirm bann zanfan ki mannyer nou kontan zot, e ki mannyer nou mazin zis sa ki byen pour zot. Koman en Minister ki responsab byennet e devlopman bann zanfan, nou pe asir tou paran ki nou pou depans tou nou lenerzi e resours pour fer ki ansanm avek zot, nou batir en lavenir solid pour sak zanfan ki anba nou swen. Nou pe demann bann paran oswa bann responsab sak zanfan pour zwenn avek nou pour nou fer grandir nou bann zanfan dan en Sesel inifye, prop e an sekirite. Ansanm annou kre sa konteks laprantisaz kot tou zanfan i santi li konfidan e alez pour aprann bann bon keksoz. Annou ede edik nou bann zanfan pour ki zot a kapab respe e aksepte lezot zanfan e adilt ki viv otour zot.
Bokou paran pe reisir dan enkilke bann bon valer e tou laspe total devlopman zot zanfan. Minister Ledikasyon i felisit zot e i anvi ki ansanm nou kontinyen sa travay formidab. Nou bann zanfan i fyer ler zot get nou e nou osi nou fyer ler nou get zot. Minister Ledikasyon i egziste akoz zanfan, e se zisteman zanfan ki sours tou nou lafors e determinasyon.
Pas en bon lazournen tou zanfan. Nou kontan zot tou bokou menm.
